YLE: ”Valgien Suomen puoles toruaju järjestö” rubei patruliiruimah pihoil Jovensuus

http://yle.fi/uutiset/valgien_suomen_puoles_toruaju_jarjesto_rubei_patruliiruimah_pihoil_jovensuus/8580459
”Valgien Suomen puoles toruaju järjestö” rubei patruliiruimah pihoil Jovensuus 
Miehet liikutah joukolleh Pohjas-Karjalan piälinnan pihoil Soldiers of Odin -tunnukset sovis. Monikul’tuurizen järjestötoimindan kehittäi on huolevunnuh pihapatruliiruičendas. Policii juohattau, gu por’adkankačondu on virguvallan dielo.
”Ižänmuallizekse valgien Suomen puoles toruajakse järjestökse” iččie nimittäi Soldiers of Odin on aloitannuh  pihapatruliiruičendan Jovensuus. Sicializes medies levinnyös tekstas ečitäh uuttu ozanottajua patrulih.
"Pihapatruliiruičendu enämbäl vähendäy turvalližuttu, migu ližiäy sidä." – Ville Elonheimo
Tekstas sanellah, kui liikutah pihoil naizien, lapsien da enne kaikkie suomelazien vardoittavannu. Pädeväkse ozanottajakse kačotah moine mies, kudual on pyzyväine lojaližus da luottamus toizii ozanottajii kohti.
Jovensuun policies lujitetah, gu linnan uuličoil liikkuu joukko miesty, kudualoin sovis on merkindy Soldiers of Odin.
– Policiipatrulile miehet ollah saneltu, gu tahtotah vardoija rauhua linnan pihoil. Meijän puoles tämä dielo voibi jatkuogi, ga yhtelläh por’adkankačondu kuuluu policiele. Sanozin vai pihapatrulile: ”Ilmoitakkua nähtylöis pahois dielolois da ruandois policiele libo hädäkeskukseh, älgiä ottavukkua iče toimenpidehih, sanou ylikomissuaru Vesa Kostamo.
Ylikomissuaru yhtelläh korostau, gu policien mieles Jovensuun ylellizes järjestysturvalližuos ei ole mostu probliemua, mittuzeh näh paistah pihapatruliiruiččijat.
Kodivuttamisruavon tagahodu?
Monikul’tuurižusruavos kohtavundu pihapatruliiruičendah on policien kohtavundua äijiä negatiivizembi. Kanzoinvälizet opastujat da muahmuuttajat ollah harjavuttu pidiä Jovensuudu omannu illanviettopaikannu kui muutgi linnalazet.
– Pihapatruliiruičendu on tiel kodivuttamisruavole. Ulgomualasvastaine liikehdindy enämbäl vähendäy turvalližuttu, migu ližiäy sidä. Konzu patruliiruiččijat sanotah, gu vaigu yksii ulgomualazii kačotah, se vähendäy vällytty da turvalližuontunduo kaikil, muga sanou monikul’tuurizen järjestötoimindan kehittäi Ville Elonheimo Pohjas-Karjalan Socialiturvuyhtistyksespäi.
Elonheimo sežo miettiy, olisgo Soldiers of Odin yhtistyszakonan mugah kielletty yhtistys, sendäh gu kerhon tekstois on vihjavustu vojennoloih, väinkäyttöh, piälystöh da lojalitiettah. Elonheimo tahtos virguvallan tabah, gu väinkäyttövaldu pyzys policiel.
Soldiers of Odinan piäpaikas Kemis ei kommentiiruija Jovensuun pihapatruliiruičendua nikui.
– En tule pagizuteltavakse Ylele, lyhyöh tovendau yksi pihapatrulin organizuattorois Mika Ranta.

Ei kommentteja:

Lähetä kommentti