Uuzi karjalan pruazniekku

Tulgua kuundelemah Syndyy da pidämäh vesseliä

Talvikuun 26.päivänny Karjalan tazavallan piälinnas Petroskoil, ihan keskučas pietäh talvifestivuali. 

Festin piettyy kodvazen peräs algavuu Päivän seizonduaigu - päivänpalaus. Päiväine rodieu pezäs. Vessel da vuotettavu aigu rahvahal. Päivät ruvetah pitkenemäh, yöt lyhenemäh. Ies rodieu synnynmuanaigu, sva`tkat. Vähästy sidä enne tullah mieron juhlat Uuzi vuozi, Rastavu da Vieristy. Rastavan da Vieristän välizel aijal – synnynmuanaigah - nuorižol pidäy bauhuakseh kylläl – sit lembi nouzou, lykkyy da sluavua liženöy. Kai net pannah yhteh čottah festivualin pidäjät – Karjalan tazavaldaine liikeh, Nuori Karjala da Karjalan Rahvahan Liitto. Hyö kučutah pidämäh iluo da kuundelemah Syndyy. Jogavuodehine Nuoren Karjalan etno-illačču ROPIVO rodieu suuren festivualin ilduozannu.

Pivon hommuajat kučutah petroskolazii da gostii juhlii pidämäh. Programmu algavuu Krasnaja- 10 Zefir-kluuban pihas 15.00 čuasun aigah. Tänne oletto tervehetulluot perehinneh, lapsienke. Tansuu, pajuo, kyykkä-kižua, kilbailemistu roih kylläl. Autetah Karjala-joukkoveh da Kulkuset – lapsienjoukko. Jälles pihaprogrammua Zefiran huonuksis vojii lämbiekseh, ostua syömisty da juomistu, kaččuo master-kluassoi, luadie ostokset, kuunella muuzikkua, opastuo soittamah kanzallizil soittimil. Autetah Skylark da Natalja Šamrai. Glögi da sulčinat roijah sen piäle. Päivyprogrammu on ilmaine kaikile.

19.00 algajen roih ROPIVO – ilduprogrammu, kudai kestäy puoleh yössäh. Sattuma, Ilmu, Santtu Karhu & Talvisovat, Noid, Ondrei, Kuter`ma soitetah da pajatetah nuorižon hyviä mieldy vaste. Juhlis ruvetah emändöimäh Vieristän akat. Niidy kuunellah, pietäh čestis. Dai Syndy roiteh. Häi rubieu arbailemah, piettelemäh rahvastu kuris. Hänen vallas rodieu tämävuodehine Ropivo. Ropivon varustajat ehoitetah gostii šuoriekseh Vieristän akan ruuttih libo taluo Ropivon kodvazekse mitah vešši piäl – anna rodieu vesselembi. Parahis ruutis annetah lahju. 

Piäzendylippu ROPIVOH: ennepäi 250 rubl`ua (nenga 3.56 €), Ropivos paikanpiäl – 300 rubl`ua (nenga 4.27 €).

TULGUA TERVEH KUUNDELEMAH SYNDYY DA PIDÄMÄH YHTES ILUO – SIT ÄSKI UUZI VUOZI ROITEH OZAKAS DA SLUAVAKAS!!!

Ei kommentteja:

Lähetä kommentti