Yle Uudizet Karjalakse: Nurmeksen Bombal karjalažus ielleh roih nägövis ymbäri vuvven

In the future, Nurmes' Bomba will focus on karelianess all year round


https://yle.fi/uutiset/3-11746740
Yle Uudizet Karjalakse 20.1. 16:03 
Nurmeksen Bombal karjalažus ielleh roih nägövis ymbäri vuvven

Nygösty karjalažuttu yhtes nostetah nägövih Karjalan Liitto, Suojärven pidäjäseura da Pohjois-Karjalan Osuuskauppa.

Karjalazen kylän syväimenny Nurmekses on karjalastu arhitektuurua ozuttai Bomban taloi. Vuvvennu 1978 srojitun parzitaloin ezikuvannu on 1850-luvul Suojärvel Ven’an Karjalas nostettu Jegor Bombinan taloi.Jouki Väinämö / Yle

Karjalažuos uvvessah luajitah matkuandan piäsyväindyö Nurmekses.

Karjalan Liitto da Suojärven pidäjäseura otetahes organizuimah Bomban talois karjalazii pidoloi ymbäri vuvven.

Uuzih pidoloih kuulutah ezimerkikse ferezi- da käzipaikkukursat, eriluaduzet ozuttelut, karjalan kielen da sugututkimuksen kursat sego luvendukodvazet lapsih niškoi karjalan kielel.

– Omat juuret, identitiettu da sugu kiinnostetah rahvastu ijäs rippumattah. Karjalaine identitiettu nygözel aigua eläy ylen lujannu, nenga sanou Karjalan Liiton paginanvedäi Outi Örn.

Örnän mugah korona-aigu on livutannuh ristikanzoi tiijustamah omih juurih näh. Karjalan Liiton nenga 360 jäzenseurua ollah löytty uuttu muoduo aktiivizeh ruandah ymbäri Suomie.

Yhtesruavon vuoh Karjalan Liitto tulou järilleh omile juurile, sendäh gu se oli vuvvennu 1978 srojitun Bomban taloin yksi srojittajis da keräl sežo kohtan ruandas vuodessah 2001.

Bomban omistajannu olles Pohjois-Karjalan Osuuskauppa (PKO) tariččou pidoloih niškoi Nurmekses tilat sego abuu markinoičendah.

– Meijän tavoittehennu on luadie Bombas ymbärivuodine karjalažuon pidotaloi, nenga sanou PKO:n matkuandu- da pitäičendukaupan matkuandu- da myöndyjohtai Tiina Kanninen.

Kanninen sanou, gu Bomban taričendu on ”nygösty karjalastu l’uksua”, kuduah kuuluu modernua kul’tuuruelämysty, karjalastu perindyö, alovehen čomua luonduo da luavukastu eländykohtua sego restoranua.

Karjalan Liiton mugah ozuttelut ollah rahvahale ilmazet, da nenga sit enämbi rahvastu voibi tuttavuo karjalažuoh Bombal.

Enzimäine ozuttelu ”Kalevalan laulumailta” avatah tuhukuul. Toivo Talven taidografiekkuozuttelus on ristikanzan da maizemien kuvua Raja-Karjalaspäi.

Ozuttelun organizuiččou Suojärven pidäjäseura. Seura pidäy tuhukuul sežo ferezikursan sit, kui azutah karjalazen tytön libo naizen rahvahanruutat.

suomekse https://yle.fi/uutiset/3-11743098


https://www.ylakarjala.fi/uutiset/item/2498-bombasta-karjalaisuuden-tapahtumatalo-karjalan-liitto-uudelleen-mukaan-bomban-toimintaan

https://www.karjalanliitto.fi/uutiset/2021/01/nykykarjalaisuus-kiinnostaa-ja-identiteetti-elaa-vahvana.html

Ei kommentteja:

Lähetä kommentti

terralympus